Miami Experiences 2018-2020

ميامي	يناير 2018
الطبيب	المستشفي	مسافر من
Dr. Nabil Matar	Jackson North Hospital	مصر

 

السلام عليكم و رحمة الله و بركاته … تجربتى فى ميامى

الطيران :  سافرت اخر اسبوع بالسابع حجزت على لوفتهانزا ترانزيت فرانكفورت مسألوش ولا على تقرير ولا اى حاجة 

كنت حاجزة economy لحد فرانكفورت و الطيارة كانت ضيقة شوية تعبت فيها بس كانت ٤:٣٠ بس .. بعد كدة نزلت المانيا و كانت التيكت عليها  ssss اخدونى على تفتيش منفصل نفس العادى بس الفرق اننا فى بوابة منفصلة كنت انا و ٢ بس مخدتش ٥ دقايق و كنت مخلصة  .. بعد كدة حمدت ربنا عشان كان العادى طابور طويل جدا و كنت حتعب من الوقفة .. كنت حاجزة premium economy  على طيارة ميامى و كانت تحفة من كل حاجة و كنت exit seat  الكراسى واسعة و leg roomو الاكل كنت مختاراه حلال و الخدمة ممتازة..

 

مطار ميامى: نزلت و كان معايا خالتو و جرينا بسرعة على الجوازات  رابع ناس و كل الي قدمنا كانوا كندين و عائلات .. . دخلنا الجوازات  لقينا الاوفيسر بيقولى انتوا تؤام و اقعد يهزر و قالى انتى حتقعدى قد ايه قولتلوا حوالى شهر و نص قالى ليكى قرايب او اصحاب قولتلوا لا و سألنى على العنوان ده مين قولتلوا دى شقة مأجراها من على  قالى اوك و خاتملى بعدين سألنى انتى بتشتغلى ايه و قولتلوا .. 

السكن : حجزت مع ٥٣ يوم ب ٣٥٠٠ و ممكن لو مدة اطول ينزل بالسعر .. ميزة  ان كل الي بيسكنوا عندوا من جروب الولادة فحتلاقى كلوا يعرف بعضوا و بجد احلى حاجة بتهون على الواحد الغربة و الانتظار لاننا كنا بنخرج مع بعض و  دايما فكانت احلى حاجة و خصوصا لما تعبت جوز جارتى هو الي اخدنى المستشفى فالناس كتير متعاونة..

الدكتور : نبيل مطر دفعتلوا اول مروحت ٥١٥٠ عشان انا تؤام و فى نفس  دفعت المستشفى ٥٢٥٠ و حددلى موعد ولادة يوم ٢/٥ يعنى انا لسة مولدتش  انا للاسف جالى مياة على الكلى و روحت اول مرة طوارئ و خرجت بعد ما ادونى مسكنات و تانى يوم روحت تانى بس حجزونى يوم و تانى يوم قالوا حيخلونى يوم تحت الملاحظة بس الوجع اشتد عليا فدخلونى عمليات .. هم كانوا مدينى حقنة رئة قبل الولادة ب ١٢ ساعة و واحدة تانية قبل الولادة ب نص ساعة بس ملحقتش تشتغل طبعا

الولادة :  بالاسبوع ال ٣٤ و الاولاد نازلين حجمهم قليل و مشكلة بالتنفس قاعدوا بالحضانة حوالى ١٠ ايام، الدكتور عملى  discharge من المستشفى يوم بدرى عشان مدفعش اليوم الي داخلتوا ساعة الطوارئ

المستشفى : نضيفة و التمريض هايل مش  حد ولا حاجة خالص انا جوزى مكنش معايا و جالى تانى يوم الولادة  .. طبعا انا مخدتش zero bill من المستشفى عشان الحضانة ..

شهادة الميلاد و الجوازات : تانى  عدوا عليا ال admin و اخدوا منى الاسامى و عملولى طلب لل social secuirty و احنا رحنا بالفورم مكتب الشهادات و طلعنا ٥ نسخ الاولى ب ٢٠ و الباقى ب ١٥ مخدناش ربع ساعة

الجواز حجزنا موعد بعد خروج الاولاد من الحضانة بس لازم يكون معاكم حجز طيران مش اكتر من اسبوعين عشان يطلعوا الجواز انا عملت حجز مع شركة سياحة not confirmed  و استلمنا الجواز امبارح الحمد الله

استلمنا السوشيال كمان النهاردة الحمد الله و ده اليوم ال ١٤ من الطلب بس للاسف مش حنقدر نسافر لحد منشوف حل فى موضوع الحضانة 

الشوبنج : فى مولات كتير بس outlet , dolphine mall w sawgrass mall كل حاجة برخص التراب مقارنة بأسعار مصر للناس الي بتضرب فى ١٨:٣٠  فى كمان مول اسموا aventura جميل جدا بس اسعاره اغلى من الاوت ليت 

 Sawgrass تحفة و فى كل حاجة انا روحتوا ٧ مرات و مخلصتوش

الاكل : فى مطعم و سوبر ماركت اسموا علاء الدين بيبيع كل حاجة حلال مطبوخ و نيى يعنى عندوا فراخ و لحمة و كل حاجة

نصيحة: اتمشوا كتير و اشربوا مياة على قد متقدروا فى الطيارة لانى انا مكنتش بتمشى كتير اول ما روحت حصلى شد عضلى جامد فضل معايا ٥ ايام من كتر الارهاق

داعوتكم لينا ربنا ييسر امرنا لما هو خير و نرجع بلدنا قريب يارب

 

 التجربة – 2

 

 

تجربتى فى الولادة بامريكا (ميامى – فلوريدا) من طقطق الى السلام عليكم 

. البحث عن طبيب وولاية

لم اكن محظوظة كثيرا بان اعرف هذا الجروب او غيره لاختار الولاية ولكن لله الحمد ما اراده الله لى كان خيرا كما سترون لاحقا

تعرفت على د.نبيل مطر بميامى فلوريدا من تجربة اخ عزيز وتواصلت معه عن طريق الايميل واتفقنا على ان اسافر فى ٣٢ الى ٣٣

هو عنده باكيج شامل مستشفى ٣ ليالى قيصرى وليلتين طبيعى مع د.تخدير واطفال وطهارة للبيبى اذا كان ولد وزيارات العيادة قبل وبعد الولادة والتحاليل

سعرها 9600 للقيصرى

7500 للطبيعى

٣. البحث عن سكن وخطوط طيران

تم البحث عن السكن عن طريق بوكينج وكان فنادق غالية فانتقلنا للبحث عبر airbnb وبالفعل حجزت لمدة شهر وقمت بالدفع كامل وكان نوع الحجز مرن اى يمكننى الغاء الحجز حتى يوم الدخول لكن بكل الاحوال فى حالة الالغاء فان الموقع له اتعاب يخصمها بغض النظر عن سياسة الحجز نفسه وبالفعل الغيت الحجز وخسرت مصروفات الموقع والتى تمثل ١٠% تقريبا من قيمة الحجز

سبب الالغاء اننىلقيت شخص عنده ٣ شقق عبارة عن غرفة وصالة ي وهو قريب من الدكتور 

هذا السكن كان رائع بالنسبة لى استمتعت مع صحبة طيبة من النساء العرب الحوامل وكانوا خير عون لى.

بالنسبة للطيران فانا مقيمة بالسعودية اخترت الاماراتية الدمام – دبى – فورت لودرديل (احدى المطارات الدولية بميامى) ويرمز له ب FLL

تذكرة الذهاب كانت بيزنس والعودة سياحى لانى كنت لا اعرف متى العودة او ظروفها تكلفت فى حدود ١٢ الف ريال سعودى

تجربة الاماراتية بيزنس حلوة جدا وانصح بها وبالاماراتية عامة سواء بيزنس او سياحى .. سألونى بمكار دبى عن الحمل وقلت نعم وكان معى نموذج الاماراتية معبأ من طبيبتى بالسعودية قبل ٤٨ساعة من الاقلاع بيقول اننى بالاسبوع ال ٣١

 دخول الزوج

حضر لى زوجى قبل موعد الولادة على مطار ميامى الدولى على الخطوط التركية من الاسكندرية بيزنس وتكلفت التذكرة ٤٢٠٠ ريال سعودى (وهو سعر خيالى) 

الولادة والمستشفى

المستشفى Jackson North

الولادة كانت قيصرى ونظرا لظروف التأشيرة فقد كنت فى قلق وتوتر دام لايام الا انا طبيبى رفض وبشدة ان يولدنى قبل اتمام ٣٨ اسبوع معللا انه القانون وان المستشفى لن تقبل ذلك والحمد لله انعم الله على بولادة سلسة بتخدير نصفى

شهادة الميلاد

تم استخراج شهادة الميلاد من الهول سيتى فى نفس يوم ادخال البيانات من قبل الموظفة بالمستشفى وكان ذلك باليوم التالى للولادة وتكلفت الشهادة الاولى ٢٠ دولار ثم كل نسخة تليها ١٥ دولار .. يوجد بميامى ٣ مراكز لاستخراج شهادات الميلاد

 جواز سفر البيبى

تم حجز موعد من الانترنت والاوراق المطلوبة هى شهادة الميلاد وجواز الاب والام وتذكرة البيبى ضرورى جدا واهم شئ صورة البيبى ويجب ان يكون فاتح عينيه ووجهه للامام وبمنتصف الصورة واذنه وشعره ظاهرين يمكن اخذ صورة بالمنزل وطباعتها باحدى فروع صيدلية Walgreen والمنشرة فى المدينة او يمكن اخذ البيبى وتصويره بالصيدلية نفسها لكن الامر سوف يصبح اصعب لاننا لانضمن ان يفتح الرضيع عينه .. فى يوم الموعد تتوجه من الصباح دون النظر الى وقت الموعد لان الطوابير غفيرة خاصة يوم الاثنين بداية الاسبوع ويجب تواجد الاب والام (لا اعرف شى عن التفويض من الاب للسماح للام بعمل الجواز بمفردها لان زوجى كان معى ولكنه ممكن) .. يتم تحديد موعد استلام الجواز بناء على تذكرة سفر البيبى وعامة المدة لا تتعدى الاسبوع للاستلام .. سعر الجواز ١٦٥ دولار

العودة

كانت العودة على الاماراتية سياحى وبمجرد اضافة البيبى على تذكرتى عن طريق الهاتف تم مقعد امامى لى فى الصفوف الاولى التى يصلح وضع بيسنت بها وكانت الرحلة سلسة والحمد لله والبيسنت اراحنى كثيرا

١١. التسوق

التسوق فى ميامى لايختلف فى اعتقادى عن اى ولاية اخرى لان سلسلة المحلات واحدة من المحال التى انصح بها بالنسبة للماركت فارخص ماركت هو

Walmart

يليه winn dixie

يليه publix

وبالنسبة للمشتريات .. يوجد اكثر من مول لكننى سأذكر المخصصين للاوت ليت

Sawgrass

Dolphin

ومحلات اخرى تبيع ماركات باسعار مخفضة مثل

Ross

Marshals

TJ maxx

قد يكون هناك اشياء اخرى لكننى لم اتطرق لها فالتمسوا لى العفو

بالنسبة للاكل الحلال يوجد محل اسمه علاء الدين قريب جدا من عيادة الدكتور وامام المستشفى مباشرة يبيع لحوم حلال وبه مأكولات عربية

كما يوجد بعض المطاعم الحلال المتفرقة

تأجير السيارة

تم التاجير اونلاين من مكتب budget حيث اختلف السعر عن السعر من المكتب نفسه لاكثر من النصف .. وهذه نصيحتى قوموا بالايجار اونلاين وليس مباشرة من المكتب

استأجرنا سيارة سوناتا كانت فى حدود ٣٨ دولار باليوم

الترفيه فى ميامى

لايوجد 

ميامى تشتهر بشواطئها والحياه الليلية وهو مالايناسبنا كأعراف او كحوامل بالشهور الاخيرة

لذا تتركز المتعة الوحيدة ( او حسب تجربتى فليصححنى البعض فى ذلك ان ارادوا) فى التسوق

مرفقات هذا البوست

-ارقام تواصل د.نبيل مطر

-رقم دانييل لتأجير الشقق

-موقع استخراج الجواز

-موقع الهول سيتى لاستخراج شهادة الميلاد

To get birth certificate

Dade County Vital Records

18680 NW 67th Ave, Hialeah, FL 33015, USA

+1 305-628-7227

https://goo.gl/maps/L1fcvdyo2GQ2

ده موقع استخراج شهادة الميلاد

https://passportappointment.travel.state.gov/

له موقع حجز موعد للباسبور

Miami Passport Agency

1501 Biscayne Blvd #210, Miami, FL 33132, USA

+1 877-487-2778

https://goo.gl/maps/f26Yt6bkgx22

ده موقع استخراج الباسبور

 

  

التجربة – 3

السلام عليكم

تجربتي مع الولادة كانت في ولاية فلوريدا ميامي

مقيمة في المملكة العربية السعودية الرياض

استخرت الله انا و زوجي و اخترنا ميامي

اولا

 ميامي بتتميز بسرعة و سهولة استخراج شهادة الميلاد و إجراءات الباسبور

ثانيا

وجود فلوريدا علي الساحل الشرقي لامريكا يعني ممكن اوفر في عدد ساعات السفر شوية

ثالثا

فلوريدا بالنسبالي كانت مريحة نفسيا بسبب جو البلد المرح خصوصا أني كنت رايحة لوحدي

و هي ممتعة للي حابب يتفسح فيها فرصة كويسة للترفية و الفسح خصوصا في اورلاندو اللي تبعد عن ميامي ٣ ساعات بالسيارة تقريبا

رابعا و الأهم

بالنسبة ليا كانت مريحة جدا فكرة ان الدكتور يبقي مصري او عربي عموما زيادة علي كدا صديقة مقربة ليا بالفعل ولدت مع دكتور نبيل مطر قبلي و شكرت جدا فية

 

قبل السفر اول حاجة كان بينا و بين دكتور نبيل مراسلات إيميل زوجي ارسلة فيها ملف الحمل كامل و سأل عن

رأية المبدأي في حالتي

هل هتبقي ولادة طبيعية او قيصرية

و ممكن يبقي معاد الولادة امتا

و تكلفة الولادة

 و كان بيرد علي كل الإيميلات و بسرعة و أدانا تكلفة الولادة القيصرية علي أساس أني غالبا هولد قيصري لان دي تاني ولادة ليا و اللي قبلها كانت ولادة قيصرية و اللي هي كانت بتكلفة باكدج 9600$

إيميل الدكتور office@nabilmatar.com

 

السكن

كنت ساكنة عند واحدة عندها شقق للإيجار كويسة و بسعر كويس داخل كمباوند سكني بحراسة شرطة و قريبة للمستشفي و لعيادة الدكتور و الشقق مكانها حلو بتطل علي مرسي الشقة فيها غرفة نوم واحدة فيها سريرين مرتاحين مش صغيرين الشقة

انا كنت واخدة سعر الليلة 60$

و 60$ cleaning fee

و 250$ تأمين بيسترد قبل مغادرة الشقة و تسليم المفتاح

 شخص رائع في التعامل متعاونة لما كنت بحتاج حاجة او بطلب منها حاجة ناقصة في الشقة للمطبخ مثلا مكانتش بتتأخر

 علي بعد دقيقتين بالعربية او ١٠ دقايق مشي تقريبا من البيت في مجمع فية سوبر ماركت Winn-Dixie شغال لحد ميدنايت و في جنبة Tj max محل لبس فية ماركات لبس كتير و أدوات منزلية

و في اوبشن سكن تاني عند واحدة عندها شقق للإيجار في منطقة sunny isles من احلا المناطق في ميامي و قريبة في نفس الوقت للعيادة و للمستشفي بتأجر تقريبا بمتوسط بين 60 أو 65 $ في الليلة لحد 80 او 85 $ في الليلة تقريبا حسب السيزون هي بتحط سعر مختلف و حسب عدد الغرف كمان ان كان غرفة او اتنين

الشقة الغرفة الواحدة فيها سرير واحد  و ممكن يبقي في فصال يعني معاها في السعر 

مقابل السكن عند تالي ضهر مجمع فيه سوبر ماركت أسمة Milams و في Dominos pizza و في Starbucks يعني مسافة تعدية شارع صغير

و في اوبشن سكن تالت في منطقة sunny isles أغلي شوية ممكن الشهر تقريبا يبقي ب 3000$ هي زي نظام شقق فندقية صديقتي سكنت فيها 

السفر

سافرت علي لوفتهانزا بس من مصر لامريكا و من امريكا لمصر

لأني كنت عايزا ارجع علي مصر مش علي الرياض بعد الولادة و لأني كمان عديت علي مصر تركت بنتي الصغيرة مع والدتي

السفر في الذهاب

مكنتش حاطة دبابيس في الطرحة ولا في الهدوم اي حاجة معدن ولا حتي خاتم في ايدي

و لابسة في رجلي حاجة مريحة كان بالنسبالي الكروكس و شراب مريح عشان قلع الشوز في التفتيش في المطار محبتش البس كوتشي او حاجة فيها رباط تبقي حاجة سهلة في القلع و اللبس من الرجل

و مكنش معايا اي حاجة تانية خالص غير شنطة ايدي

في مطار القاهرة

و بعد ما حطيت شنطتي و عديت الجوازات و علي بوابة الطيارة في التفتيش لاحظوا حملي و وقفني موظف قالي حضرتك حامل في كام أسبوع قلتله ٣٤ أسبوع و كنت مجهزة نفسي معايا الفورم بتاعة سفر الحامل بتاعة لوفتهنزا و تقرير الدكتورة بتاعتي اللي كنت بتابع معاها في الرياض بس هو الموظف قالي طيب تمام و مطلبش حتي يشوف تقرير الدكتور و كانت الدنيا تمام جدا

 

وصلت فرانكفورت

 طبعا مطار كبير جدا مشيت كتير فيه مكنتش متضايقة من المشي دا لأنة كنت حاسة أني بفك رجلي من قعدة الطيارة شوية

بعدها التفتيش و طابور التفتيش كان في جهاز scan الناس بتعدي علية و يرفعوا اديهم  انا خفت أعدي في الجهاز فسألت الموظفة الجهاز دا أمن علي الحوامل قالتلي لية انتي حامل ؟؟ قلتلها ايوة راحت قالتلي متعديش عطلت الجهاز قدامي و عدتني و اتفتشت ذاتي و ركبت من فرانكفورت لميامي كانت رحلة ظريفة المضيفات كويسين جدا طلبت تغير مكاني و المضيفة غيرتلي مكاني

مطار ميامي الدولي

بقي وصلت الحمدلله طوابير ناس كتير عالجوازات و في جهاز كدا عديت علية الاول زي الكمبيوتر وقف قدامة حطيت الباسبور علي التأشيرة عملها  scan و و طلعلي اسألة عالكمبيوتر دا جاوبت عليها و اتصورت فية و طلعتلي ورقة من الجهاز أخدتها و مشيت علي طابور ظابط الجوازات بقي

انا شايفة قدامي الطوابير بتخلص بسرعة و بيختموا  بسرعة عشان الزحمة فضلت واقفة ادعي أني أعدي بسهولة

دخلت بمنتهي الثقة بنفسي و ناوية لو سألني حامل هقولة ايوة و اطلع من شنطتي الورق اللي انا مجهزاة بمراسلات الدكتور المذكور فيها تكلفة الولادة و المبلغ اللي معايا و تصريح السفر اثناء الحمل و كل حاجة كنت مجهزاها معايا just in case بس الحمدلله محتجتش أطلعها

 

الظابط قالي جاية لية ؟؟

قلت اجازة

جاية منين؟؟

قلت من مصر بس انا مقيمة في السعودية

قالي جاية لوحدك في إجازتك ؟؟ ولا انتي رايحة لأصحابك هنا؟؟

قلتلة جوزي كان مفروض يبقي معايا بس عندة ظروف مفاجأة في شغلة خلتة اجل السفرة و هيجيلي بعد كدا

قالي بتشتغلي؟؟

قلت لا

قالي معاكي فلوس؟

قلتله علي المبلغ اللي معايا و كروت الفيزا اللي معايا و لسة بحط ايدي عالشنطة اطلع الفلوس قالي متحطيش إيدك عالشنطة ? حسسني أني هطلع مسدس المهم

قالي جوزك بيشتغل اية ؟؟

صيدلي في شركة أدوية في الرياض

قالي هتقعدي اد اية ؟؟

قلتلة علي معاد عودتي اللي هو كان تقريبا شهر و نص قاعدة في البلد

هتقعدي فين؟؟

قلتله العنوان الفلاني و كنت حافظة العنوان

ابتسم ختملي 6 شهور

اخدت شنطتي و اشتريت خط تليفون موبايل في المطار Lycamobile بأفتكر ب 70$ يمكن unlimited calls

Unlimited internet لمدة شهر و جددت للشهر التاني online ب 30$

اخدت Lyft من المطار لحد السكن

قعدت مدة شهر تقريبا لوحدي تحركاتي كلها لعيادة الدكتور او للمستشفي او لأي محل شغالة علي ال Lyft

ملحوظة

ميامي فيها مطارين واحد Miami international airport و دا اللي انا نزلت فية

و في التاني fort lauderdale airport

محلات الاكل

كنت غالبا بطبخ في البيت قبل الولادة بعدها قضيناها مطاعم

كنت بجيب اغلب الحجات من WinnDixie السوبر ماركت القريب من السكن

المية وخضار و فاكهة و عصاير و كيكات و بسكوتات و جبن و عيش و حليب و الزيت و شكولاتات ايسكريم باستا و الصلصة و توابل ممكن البيتزا بالاجبان المجمدة  و الفرايز  و الجمبري و السمك الفيلية المجمد و الحجات الكوشير اللي بياكلها اليهود في السوبر ماركتس ممكن نشتريها عادي كنت بتجنب اللحمة و الفراخ عشان حتي لو مش pork الحجات دي مش مدبوحة غالبا بتبقي مكهربة كنت شغالة ببرناج scan halal و طبعا المناديل و الصابون كل الحجات دي 

الفراخ و اللحمة و الخضار المجمد زي البسلة و البامية و لو مثلا توابل بتاعتنا والرز المصري و مرق الماجي كنت بجيب الحجات دي من سوبر ماركت صغير و مطعم في نفس الوقت أسمة علاء الدين الاكل فية halal food كنت بجيب الفراج و اللحمة نية و اطبخها بمزاجي

دا عنوانة

Aladdin Mediterranean Supermarket, 20 NE 167th St, Miami, FL 33162, USA

المطاعم

في مطاعم حلال زي كبابجي و كان قريب جدا من السكن اللي كنت فية

دا عنوانة

Kabobji, Northeast 163rd Street, North Miami Beach, FL, USA

 كنت بروح أوقات Cheesecake Factory في Aventura Mall و أقضيها باستا او بيتزا و تشيزكيك طبعا

 او مطعم pf Chang  سي فودl

 او مطعم red lobster سي فود

 او مطعم علاء الدين بقي و دا حلال 

 ال shopping–Tj max كان له فرع علي بعد ١٠ دقايق مشي من السكن اللي كنت فية

–Burlington كنت بروح فرعة اللي في منطقة ال

–Hallandale

–Marshalls

–Ross

–Target

و كل دول من السكن اللي كنت فية كانو قريبين

بالنسبة ليا اغلب اللي اشتريتة كان من Burlington 

المولات

في Aventura Mall هو ميزتة بالنسبالي أنة كان اقرب مول و فية تشيزكيك فاكتوري و Apple store بس لانة الشرا منة اغلا من اي مكان تاني

في sawgrass mills mall و هو دا البطل بقي ال outlet mall فية كل الماركات الي في الدنيا و المطاعم و كبير جدا محتاج ايّام و ليالي عشان تخلص لف فية و مش هتخلص بردو أسعار طبعا خيال خصوصا الماركات الكبيرة كان بالنسبة ليا مول ممتاز عيبة الوحيد أنة كان بعيد من السكن بس يستاهل المشوار

في dolphin mall و دا كمان outlet mall بس انا شخصيا مرحتوش هو كمان كان بعيد عن السكن 

سفر زوجي ليا

زوجي سافر بعدي علي السويسرية اللي هي كمان تبع لوفتهنزا بس نزل الترانزيت في سويسرا  

تأجير السيارة

اتعاملنا مع واحد روسي أسمة رومان بيأجر سيارات و بسعر كويس جدا مقارنة بشركات تأجير السيارات شخص محترم جدا طلبناة جالنا لحد السكن سلمنا السيارة اجرناها مدة أسبوعين سيارة باسات ب 350$ علي ما اتذكر و اخد تأمين مبلغ 250$ و رجعه لينا لما وصلنا لحد المطار و استلم سيارته مننا

رومان رقم تليفونة +1 (305) 498-7899

و في تواصل وتساب

ممكن يوفر سيارة تستنا في المطار علي معاد الوصول للي حابب

الولادة

و كانت الحمدلله ولادة قيصرية مع دكتور نبيل

جزء من المبلغ دفعتة في عيادة دكتور نبيل اللي هو دا عنوانها

633 Northeast 167th Street, North Miami Beach, FL, USA

و الجزء التاني في المستشفي Jackson north medical center  اللي هو دا عنوانها

Jackson North Medical Center: Pathology Department, Northwest 170th Street, North Miami Beach, FL, USA

التكلفة دي شاملة التخدير و مساعد الدكتور و دكتور الأطفال لحد الخروج من المستشفي كل يوم بعد الولادة في المستشفي بيجي دكتور يشوف البيبي و طهارة البيبي لو ولد الدكتور بيعملها

المبلغ اللي دفعتة لدكتور نبيل اخدت بية انفويس فيها تفاصيل دكتور الأطفال و التخدير و التحاليل و الالتراساوند و كل حاجة دفعتلة و هو المسؤل عن كل التفاصيل دي و ال team بتاعة 

محتاجتش اجيب معايا تحاليل من برا قبل ما اروحلة

في المستشفي دفعت الجزء الخاص بيهم بس دفعت باكدج الولادة الطبيعي اللي هي اقل عشان لو حصل و ولدت طبيعي مثلا

في الاخر لما ولدت قيصري و بعد ما ولدت بكذا يوم و خرجت من المستشفي رجعتلهم قبل السفر دفعت فرق التكلفة بين الولادة الطبيعي و القيصري و مطلبوش مني اي حاجة زيادة و اخدت الزيرو بيل 

و لما روحت لدكتور نبيل الزيارة اللي بعد الولادة في العيادة كان هو علية ليا مبلغ في اخر الحساب كان واخدة مني زيادة في حال ولدت ولادة طبيعية بعد ولادة أولي قيصرية عشان ليها احتياطات تانية بس كتبلي بالمبلغ شيك

ملحوظة

حصل معايا مشكله تعبت و ارتفع ضغطي جامد جدا و مكنش بينزل الدكتور قالي وقتها روحي عالمستشفي في الدور التاني ال labor check و انا جايلك روحت المستشفي و زي ما قالي بالظبط قلتلهم أني حالة دكتور نبيل و هو اللي قالي أجي هنا عشان ضغطي عالي  الممرضات قعدو يطبطبوا عليا و كلموة تقريبا قالهم يعملوا معايا أيه و دخلوني في غرفة و حطوني عالمونيتورز و اخدت محاليل و علاج لحد ما الضغط ظبط و الوضع بقي تمام و هو جالي شافني و كتبلي دول اجيبة من الصيدلية اكمل علية بعد كدا و خرجت بعد 4 ساعات في ال labor check مش ال emergency و جالي المحاسب لحد عندي قالي مطلوب منك 60$ دفعتهم و مشيت و في بالي بقول أكيد هيعملوا charge عليا بمبلغ كبير

بس لما جيت اخد الزيرو بيل ملقتش اي charges إضافية زيادة عن الباكدج بتاعة الولادة 

المستشفي

كويسين جدا و الممرضات رائعين و caring جدا و اكتر حاجة عجبتني ال lactation specialists اللي كانو كل يوم تيجي واحد فيهم تفضل تساعد الام اللي اختارت الرضاعة الطبيعية و تساعد البيبي  مع أني أم لتاني مرة مش اول مرة اتعلمت منهم و انا ماشية طلبت منهم  Breast pump و ادوني واحد ماركة Medela باليد مش كهربا و اخدتة و أنا ماشية و الام اللي بتختار الرضاعة الصناعي بتاخد و هي ماشية حليب البيبي

ادوني كارتهم عشان لو اجتاحتهم بعد ما امشي من المستشفي اتصل بيهم عادي

انا اتفاجأت بيهم هما اللي كلموني يطمئنوا عليا و قالولي تعالي لو عندك اي مشكلة و روحتلهم فعلا لما احتاجتهم و دا كان منغير اي charges

المستشفي نفسها غرفتها كويسة و فيها كرسي nursing chair جنب السرير و كنبة كان بيبات عليها زوجي و كان لة وجبة فطار و غدا عشاء لا معرفش اشمعنا ?

تسجيل البيبي و شهادة الميلاد

انا ولدت يوم الخميس

يوم الجمعة كانت عندي في الغرفة ال social worker بتاخد بياناتنا و اسم البيبي و التفاصيل عشان حاجتين ال social security number و شهادة الميلاد و حطينا في كل حاجة عنوان الدكتور نبيل في كل الورق الرسمي قعدنا علي اديها انا و زوجي نركز في كل حرف بتكتبة عشان بعد ما بتعمل save بيبقي مينفعش او صعب جدا يتعمل edit سألناها نقدر نروح نستلم شهادة الميلاد امتا قالت انهردة الجمعة و بكرا السبت و بعدة الحد اجازة و الاتنين كمان كان اجازة وقتها كان ال Memorial Day اجازة رسمية في البلد فقالت لجوزي ممكن انهردة قبل الساعة 5 pm تروح تستلم شهادة الميلاد من (north Miami Beach Miami fade county)

و راح جوزي استلم شهادة الميلاد و اخد اكتر من نسخة

ملحوظة حطينا عنوان الدكتور نبيل عشان يبعتلنا ال SSN

و بعتهولنا مع صديقة ليا راحت بعدي ولدت معاه و رجعت

هو في العادة بيبعتة لأهل البيبي مع اي أسرة جاية من نفس البلد

او يشحنة لأهل البيبي بس يسيبوا للدكتور تكلفة شحنة

الباسبور

اتصل جوزي علطول بالجوازات (MIAMI PASSPORT AGENCY ) بعد ما أخدنا شهادة الميلاد أخدنا معاد و رقم للتقديم عالباسبور و كان في نفس الأسبوع بعد ما خرجت من المستشفي

روحنا هناك هو كان مشوار بعيد عن السكن شوية كان مطلوب أصل شهادة الميلاد وصور البيبي علي خلفيه بيضه صورنا البيبي في صيدلية WALGREENS و صور باسبور الام و باسبور الأب و صور تذاكر عودتن

و روحنا علي معادنا قدمنا الورق و استلمنا الباسبور قبل سفرنا بيوم

 

سفر العودة

رجعت انا و زوجي و البيبي بعد ١٢ من الولادة الحمدلله علي مصر و حجزنا تذكرة البيبي و احنا في المطار ممكن تتحجز عادي بالتليفون و دا أفضل و مشينا عادي جدا و عدينا  الجوازات بمنتهي البساطة و محدش سألنا في حاجة و أخدنا في الطيارة ال bassinet seat كل ما كان الذهاب للمطار بدري كل ما بقي في فرصة لحجز ال bassinet Seat دا

العودة للمملكة

دخلت بالطفل قبل مايتم 3 اشهر من مصر للسعودية و انا داخلة عالجوازات قابلت موظف قلتلة الطفل اول مرة يدخل البلد و انا معايا إقامة وداني علي طابور صغير وقفت فية و قال لظابط الجوازات اعملها تأشيرة دخول للطفل و عملهالي و انا واقفة و صور البيبي و دخلت بعد كدا زوجي مشي في إجراءات استخراج إقامة البيبي و التأمين بتاعة في المملكة

بالنسبة للتأمين تأميني تعاونية vip

كان مطلوب

ان تتقدم الفواتير قبل ما يعدي شهر من تاريخها

و ان انا أكون موجودة في المملكة قبل ما يعدي عليا 3 شهور خارج المملكة

 

 

 

 

 التجربة-4 

 

‎السلام عليكم

‎تجربتي في ميامي فلوريدا

 ‎الاختيار عشان الاجواء هناك كويسة طول السنة وديزني للاولاد في اورلاندو

 ‎السفر كان في الشهر السادس لظروف خاصة

 ‎الحجز كان لوفتهانزا نظرا لتجارب سفر سابقة

حجزت مقاعد بريميوم اكونومي وكانت ممتازة وواسعة

‎محدش سألنا عن حاجة

‎اتفتشنا في فرانكفورت زيادة عشان كان معانا دوا كحة ادول للاطفال في شنطة المدام

 ‎وصلنا ميامي محدش سأل عن حاجة وخدنا ٦ شهور

 ‎عربية جت خدتنا من المطار للبيت ببلاش لاني كنت مأجر عربية فوصلنا بحساب ايجار اليوم ولو من غير تأجير ممكن ٥٠ دولار بالكتير

 ‎المنطقة اللي قعدنا فيها من ارقي اماكن ميامي داخل كمبوند حراسة شرطة امريكية مش سكيورتي  ب ٦٠ دولار لليوم شقة كبيرة بمطبخ بتطل على نهر وامان

‎صاحبة الشقق ساكنة مع مامتها في نفس المكان وخدومة جدا على مدار الساعة انترنت واي فاي

‎اختيار الدكتور نبيل مطر كان ممتاز وسهل في التعامل ومصري وبيخدم وبيرد اي وقت

‎بعتنا ايميل واتصلنا قبل السفر واتفقنا

‎لو ماستخدمتش حقنة الضهر بيرجعلك ٨٠٠ دولار

 ‎في دكتورة من اوكرانيا للي بيحب يتعامل مع  ‎دكاترة نساء (زيادة ٥٠٠ عن نبيل) رحت عيادتها في منطقة هوليوود وممتازة الصراحة ‎لكن عشان عيادتها ابعد فضلت نبيل عنها

 ‎سيبت الاولاد  لوحدهم شهر وشوية ورجعت ‎شغلي وكنت مطمن عليهم
‎المنطقة اسمها Eastern Shores

‎المدينة سياحية اكتر من انها بزنس فمفيش دوشة

‎رجعت للاولاد مرة تانية ومكنش في حاجة في المطار سألوني قلتلهم مراتي حامل وان كان عندي شغل ضروري ورجعت وادوني ٦ شهور

 ‎الولادة في مستشفي جاكسون نورث معاملة ارقي من كده مفيش واهتمام فوق الوصف

 ‎شهادة الميلاد تاني يومالولادة طلعت في خمس دقايق من مكتب شهادات الميلاد ٢٠ دقيقة من المستشفى

 ‎الباسبور طلع في ٣ ايام ٣٠ دقيقة من المستشفى

 خدنا الزيرو بالانس والفاتورة المفصلة من المستشفى بعد يومين ومن نبيل ايضاً

 ‎المطاعم الحلال قريبة
(كبابجي-علاءالدين-القدس)

‎مطاعم تركية بعيدة شوية ممكن ٣٠ دقيقة

مطاعم السي فوود في كل مكان

 ‎الهايبر يعتبر داخل الكامبوند
في لحوم كوشر (حلال) اسمه Winn-Dixie

‎هايبر الشعب Walmart   ‎يبعد ١١ دقيقة عن السكن

هايبر بابليكس يبعد ١٠ دقايق طعام كوشر برضه

 ‎المستشفى تبعد ١٤ دقيقة
وعيادة الدكتور ١١ دقيقة

‎مفيش زحمة بشكل عام

 ‎معظم الباركاينج مجانية ماعدا الشاطيء ومكان استلام الباسبور ٨ دولار

 ‎الرفاهيات*

‎كورس ارت للاولاد ١٥ دقيقة من المنطقة

‎اشتراك في نادي تدريب فيتنس وجودو للاولاد ٥ دقايق من المنطقة

‎كورس انجلش ليا ٦ دقايق من المنطقة

‎الاوتليت ٤٠ دقيقة من السكن

‎الاوتليت في اورلاندو من ارخص  ‎الاوتليتات اللي شفتها

‎ (فنادق اورلاندو حوالي ٣٠ دولار اليوم)

‎اوليتا بارك من افضل باركات امريكا يبعد دقيقتين من السكن الدخول ب ٦ دولار للعربية ٨ افراد

‎السينيما والمول ١٠ دقايق من المنطقة

‎طلعة صيد جماعية ٥ دقايق من المنطقة (٤٠دولار نصف يوم)

‎الويكيند هنا بتحسه يوم احتفال مش يوم اجازة وخلاص

 الجروب حاجة عظيمة وساعدنا في كل حاجة

 ‎واخيراً ،، اللي ممكن يعجبني ويناسبني ممكن مايناسبش غيري والعكس

اشكر الله اولاً على التوفيق والتيسير ثم كل حد ساعدني وكان بيساعد لوجه الله ، ودا اللي بعمله مع اي حد هيكون محتاج مساعدة زي مالجميع بيساعد  يومين نخلص ونسافر ونسيب مكان لغيرنا*

 ‎وبالتوفيق للجميع

‎والسلام عليكم

 

ميامي	يونيو 2019
الطبيب	المستشفي	مسافر من
Dr. Nabil Matar	Jackson North Hospital	قطر

ميامي	سبتمبر 2019
الطبيب	المستشفي	مسافر من
Dr. Nabil Matar	Jackson North Hospital	قطر

ميامي	نوفمبر 2019
الطبيب	المستشفي	مسافر من
Dr. Nabil Matar	Jackson North Hospital	السعودية

ميامي	ديسمبر 2019
الطبيب	المستشفي	مسافر من
Dr. Nabil Matar	Jackson North Hospital	مصر

ميامي	يناير 2020
الطبيب	المستشفي	مسافر من
Dr. Nabil Matar	Jackson North Hospital	السعودية

ميامي	مايو 2020
الطبيب	المستشفي	مسافر من
Dr. Nabil Matar	Jackson North Hospital	الاردن